Мажбурий ижро бюроси Қорақалпоғистон Республикаси Беруний туман бўлими давлат ижрочилари томонидан олиб борилган ижро ҳаракатлари натижасида қарздор ота беш йиллик алимент пулини олдиндан тўлади.

Фуқаролик ишлари бўйича Беруний туманлараро судининг жорий йил 5 апрель кунги ижро ҳужжатига асосан ундирувчи И.Г.нинг фойдасига тарбиясидаги бир нафар фарзандининг таъминоти учун қарздор Б.Р.нинг ҳар ойдаги жами даромадининг 1/4 қисми миқдорида алимент ундириш белгиланган. Мажбурий ижро бюроси Беруний туман бўлими давлат ижрочилари томонидан қарздорнинг номидаги автомашинага тақиқ белгиланиб, унинг четга чиқиш ҳуқуқига нисбатан чеклов ўрнатилди. Бундан хабар топган ота бўлимга келиб, яқин орада чет элга чиқиши кераклигини ва четга чиқишнинг йўлларини сўраган. 

Шунда бўлим давлат ижрочиси томонидан қарздор отага Ўзбекистон Республикаси Вазирлар Маҳкамасининг 2018 йил 6 октябрь кунги “Алиментларни олдиндан тўлаш, шунингдек, алимент тўлаш мажбуриятини таъминлаш бўйича гаров шартномасини тузиш тартиби тўғрисидаги низомни тасдиқлаш ҳақида”ги қарори асосида ҳисоблаб чиқилган беш йиллик алимент пули олдиндан тўланса, четга чиқишга ўрнатилган чеклов вақтинчалик бекор қилиниши ҳақида тушунча берилди. 

Шунда сўнг қарздор жорий йилнинг 5 май куни Мажбурий ижро бюроси Беруний туман бўлимига келиб, беш йилга ҳисобланган 63 миллион сўмдан ортиқ алимент пулини ундирувчи И.Г.га олдиндан тўлаб берди.