Фуқаролик ишлари бўйича Сурхондарё вилояти Термиз туманлараро судининг 2020 йил январдаги суд буйруғига асосан Р.Жалиловдан вояга етмаган икки фарзандининг моддий таъминоти учун алимент ундириш белгиланган.

Мазкур ижро ҳужжати Мажбурий ижро бюроси Бойсун тумани бўлими иш юритувига қабул қилингач, ижро ҳаракатлари бошланган. Бироқ, Бойсун туманида яшовчи алиментчи ота фарзандларининг моддий таъминоти учун 23 миллион сўмдан ортиқ алимент пулини тўлмагани сабабли суд қарори билан 15 сутка маъмурий қамоқ жазоси қўлланилди, ҳуқуқий тушунчалар берилди.

– Натижада қарздор ота алимент пулини собиқ турмуш ўртоғи учун эмас, балки фарзандларининг моддий таъминоти учун зарурлигини англаб етди, – дейди МИБ Бойсун тумани бўлими давлат ижрочиси Азиза Пўлатова. – Уйсиз қолган жигарбандларининг эҳтиёжидан келиб чиққан ҳолда алимент тўловлари эвазига Термиз шаҳридаги кўп қаватли турар-жойларнинг биридан бир хонали уйни икки фарзандига ҳадя қилди. Уй тегишли тартибда расмийлаштирилгач, алимент ундирувчининг аризасига асосан ижро ҳужжати белгиланган тартибда муддатидан олдин иш юритувдан тугатилди.