Ijtimoiy tarmoqlarda tarqalgan bir videoni koʻrib, juda taʼsirlandim. Buzogʻini endigina dunyoga keltirgan sigir bolasiga qarab shu qadar talpinyaptiki, ayni paytda uning uchun hamma narsaga tayyor. Sigirning egasi esa buzoqni shunchaki sovuq molxonadan issiq uyga olib kirayotgandi, xolos. Buni tushunmagan sigir bolasidan ayrilib qolayotgandek sarosimaga tushib qolgandi.

Bolaligimda Qoradaryoda koʻp choʻmilardik. Daryo boʻyiga chagʻalaylar tuxum qoʻygani bois, oyoqlarimiz ostida polaponlar yugurib yurardi. Boshimiz uzra uchib yurgan qushlar esa polaponini himoya qilish uchun boshimizga chang solardi.

Bir yili gʻozimizning bolalari shol boʻlib qoldi. Aksiga olib har kuni ikki-uchtasi hayotdan koʻz yumadi. Rahmi kelgan otam ularni daryoga oqizib yuborishni buyurdi. Koʻz oldimizda jon talashishiga dosh berolmaganidan qildi bu ishni. Biz ham gʻoz bolalarini daryoga oqizdik. Shunda qanotini keng yozgancha, garchi ucha olmasada, bolalari ortidan yugurgan gʻozimiz oʻzini suvga otdi. Qarshisida paydo boʻlgan toshga urilib ketmasligi uchun bolalarining oldi tomoniga suzib, ularni zarbdan himoya qilgancha birga oqib ketdi.

Bularni nega esladim? Chunki, bu yerda ota-onalik hissi, farzandga boʻlgan tengsiz muhabbat ifodasi mujassam. Eng achinarlisi shundaki, biz uchun ojiz hisoblangan jonzotlarda saqlanib qolgan mana shu tuygʻu bugungi kunga kelib ayrim inson zotiga yetishmay qolmoqda.

Fuqarolik ishlari boʻyicha Izboskan tumanlararo sudining navbatdagi sud majlisini kuzatar ekanman, atrofimizda qanchadan-qancha tirnoqqa zor insonlar boʻlsayu, oʻz zurriyotini tashlab qoʻygan otalar ham borligiga chin yurakdan achindim. Ular uchun ota boʻlish balki osondir, biroq otalik qilishga kelganda...

Paxtaobod tumanida istiqomat qiluvchi Nabijon Vosilovning ikki farzandi bor. Er-xotin oʻrtasidagi oʻzaro kelishmovchilik tufayli ular aro yoʻlda qolganlar. Ota xabar olmaydi, onaning topgani tirikchilikka yetmaydi. Noiloj qolgan ayol eridan aliment undirish maqsadida sudga murojaat qilgan. Sud qarorini mensimagan erkakning oʻz farzandlari uchun toʻlashi kerak boʻlgan alimenti miqdori 16 million 107 ming 816 soʻmni tashkil qilgan.

Baliqchilik Jahongir Joʻrayev ham ikki farzandini qon qaqshatgancha, ajrashib ketgan. U aslida turmush oʻrtogʻi bilan ajrashgan edi, biroq farzandlarining ham yuziga oyoq qoʻydi. Natijada ikki yil davomida toʻlashi kerak boʻlgan aliment miqdori 15 million 841 ming 981 soʻmga yetdi.

“Misollarni koʻplab keltirish mumkin,-deydi Majburiy ijro byurosining Andijon viloyati boshqarmasi Matbuot xizmati rahbari Oyistaxon Abdurahmonova. –Bu kabi oila sohiblari qay holatda turmush kechirishlaridan qatʼiy nazar farzandlari uchun masʼul ekanliklarini unutmasliklari kerak. Oʻz zimmalaridagi burchini bajarmaganlar esa qonun oldida javobgardirlar”

Soʻnggi soʻz oʻrnida aytar gapimiz bitta: Aziz otalar! Bizning jonzotlardan farqimiz bitta –biz INSONmiz! Insonligimizcha qolaylik.

Foydali havolalar