Мазкур хабарда, Сурхондарё вилоятининг Ангор туманида яшовчи фуқаро Э.Гаппаров тоомнидан суд қарорига кўра ҳокимликдан 4 млн. 700 минг сўм товон пулини Бюронинг Ангор туман бўлими ундириб бермаётганлиги, шунингдек ишга тиклаш бўйича суд қарори ижросини таъминлашда ҳам сансалорликка йўл қўйилаётгани ҳақида эътироз билдирилган.

Хабардаги ҳолатни ўрганишда, фуқаролик ишлари бўйича Шеробод туманлараро судининг 20.08.2019 йилдаги ҳал қилув қарорига асосан берилган ундирувчи Э.Х.Гаппаровни Ангор туман «Охунбобоев» МФЙ масъул котиби вазифасига ишга тиклаш ҳақидаги ижро ҳужжати юзасидан 23.08.2019 йилдан Бюронинг Ангор туман бўлимида ижро иши юритилиб, қарор нусхаси шу куннинг ўзида қарздорга топширилган ва ижро ҳужжати талабини дарҳол бажариш сўралганлиги маълум бўлди.

Шунингдек, фуқаролик ишлари бўйича Сурхондарё вилоят суди апелляция инстанциясининг 08.10.2019 йилдаги ажримига кўра, фуқаролк ишлари бўйича Шеробод туманлараро судининг 20.08.2019 йилдаги ҳал қилув қарори тўлдириш йўли билан ўзгаришсиз қолдирилган ва Ангор туман ҳокимлигидан Э.Х.Гаппаров фойдасига 4 млн. 705 минг сўм иш ҳақи ундирилиши белгиланган.

Ижро ҳужжатига асосан фуқаро Э.Х.Гаппаровни дарҳол тумандаги «Охунбобоев» МФЙнинг масъул котиби вазифасига ишга тиклаш, бу ҳақда ишга тикланганлигини тасдиқловчи ҳужжатлар нусхаларини тақдим этиш, акс ҳолда Ўзбекистон Республикаси МЖтКнинг 1981-моддасида белгиланган жавобгарлик чоралари қўлланилиши ҳақида огоҳлантирилиб, 06.09.2019 йилда Фуқароларнинг ўзини ўзи бошқариш органлари фаолиятини мувофиқлаштириш бўйича Ангор туман кенгаши раисининг биринчи ўринбосари А.Давроновга талабнома топширилган.

Огоҳлантиришларга қарамасдан, Фуқароларнинг ўзини ўзи бошқариш органлари фаолиятини мувофиқлаштириш бўйича Ангор туман кенгаши раисининг биринчи ўринбосари А.Давронов томонидан ижро ҳужжати талаблари бажарилмасдан келинганлиги боис 31.10.2019 йилда унга нисбатан Ўзбекистон Республикаси МЖтКнинг 198-1-моддасига асосан энг кам ойлик иш ҳақининг ўн баравари – 2 млн. 230 минг сўм миқдорида жарима қўлланилган.

Бундан ташқари, фуқароларнинг ўзини ўзи бошқариш органлари фаолиятини мувофиқлаштириш бўйича Ангор туман кенгаши раисининг биринчи ўринбосари А.Давронов ижро ҳужжати талабини қасддан бажармасдан келаётганлиги боис унга нисбатан Ўзбекистон Республикаси ЖКнинг 148, 232-моддалари билан жиноят иши қўзғатиш масаласини ҳал этиш учун тўпланган ҳужжатлар 05.11.2019 йилда Ангор туман прокуратурасига юборилган.

Шундан сўнг, фуқароларнинг ўзини ўзи бошқариш органлари фаолиятини мувофиқлаштириш бўйича Ангор туман кенгашининг 07.11.2019 йилдаги № 121-К буйруғига асосан Э.Гаппаров «Охунбобоев» МФЙнинг масъул котиби вазифасига ишга тикланиб, суд қарорининг ишга тиклаш қисми тўлиқ ижро этилиши таъминланганлиги боис «Суд ҳужжатлари ва бошқа органлар ҳужжатларини ижро этиш тўғрисида»ги Қонуннинг 41-моддасига асосан ижро иши юритиш тамомланган.

Белгиланган муддатда Ангор туман ҳокимлиги томонидан ундирувчи Э.Х.Гаппаровга иш ҳақи ва маънавий зарар ундириш талаблари бажарилмаганлиги сабабли, 19.11.2019 йилда туман ҳоким номига талабнома берилиб, ижро ҳужжати талабларини бажармаган ёки бажарилишига тўсқинлик қилган масъул шахслар Ўзбекистон Республикаси МЖтКнинг 198-1-моддасида белгиланган жавобгарлик билан огоҳлантирилган.

Ҳозирда, жорий йилнинг 22 октябрь куни келиб тушган ижро ҳужжати бўйича қарздор Ангор туман ҳокимлигидан Э.Х.Гаппаров фойдасига 4 млн. 705 минг сўм иш ҳақи ҳамда 1 млн. 102 минг сўм маънавий зарар ундириш ижро ҳаракатлари олиб борилмоқда.

 

 

Мажбурий ижро бюроси

Фойдали ҳаволалар