Joriy yilning o‘tgan davrida 3 million 700 ming ijro hujjatidan 2 million 700 mingining ijrosi ta’minlandi. Bir million hujjat esa o‘z ijrosini kutmoqda. Bu haqda Majburiy ijro byurosi va Oliy sud mas’ul xodimlari ishtirokida ommaviy axborot vositalari xodimlari uchun uyushtirilgan brifingda bu alohida qayd etildi, deb yozadi O‘zA.

Ijro hujjatlari ko‘pligidan tizim xodimlari 16 baravar yuklama bilan ishlamoqda. Aholining 80 foizi qarzlarini bir marta ogohlantirishdan keyin to‘layotgan bo‘lsa ham ijro intizomi bo‘yicha muammolar yo‘q emas.

Tadbirda O‘zbekiston Prezidentining 2019-yil 12-martdagi “Sud hujjatlari va boshqa organlar hujjatlarini ijro etish samaradorligini yanada oshirish chora-tadbirlari to‘g‘risida”gi ijrosiga e’tibor qaratildi.

Byuro direktori o‘rinbosari Shavkat Haydarov joriy yil 1-apreldan boshlab sud hujjatlarini majburiy ijro etish jarayoniga mediatsiya instituti joriy etilishini ta’kidladi. Bu institut sud qarorlari bo‘yicha tomonlarning mediator orqali o‘zaro kelishish, masalani ixtiyoriy rozilik asosida hal qilish imkonini bermoqda.

Qaror bilan 1-iyundan boshlab ijro ishi yuritishni qo‘zg‘atish ijro hujjati kelib tushgan vaqtdan boshlab bir ish kuni ichida ijro ishi qo‘zg‘atilishi yo‘lga qo‘yildi (muqaddam ijro ishi 3 kun ichida qo‘zg‘atilardi).

Yana bir jihat — ijro harakatlari ko‘pi bilan ikki marta kechiktirilishi mumkin, oldinlari necha marta kechiktirilishi mumkinligi qonunchilikda ko‘rsatilmagan edi. Bu esa ijro hujjatlarining ko‘p bora to‘xtalib, undiruvchi tomonlarning noroziligiga sabab bo‘lardi.

Endilikda ijro harakatlarini bajarishda yuzaga kelgan masalalarni tushuntirish uchun davlat ijrochisi tomonidan tayinlangan mutaxassis ijrochining qarori bilan tanishgan kundan boshlab 15 ish kuni ichida yozma xulosa taqdim etishi qat’iy belgilangan.

Hozirga qadar ijro hujjatlari davlat ijrochilari o‘rtasida bo‘lim boshlig‘i tomonidan taqsimlanar edi. Biroq odatiy taqsimlash tizimi davlat ijrochilarining ish hajmini nomutanosib belgilanishiga, ayrim hollarda ishlarni taqsimlashda guruhbozlik va tanish-bilishchilikka sharoit yaratishi mumkin.

Bu kabi salbiy holatlarning oldini olish maqsadida ijro hujjatlarini avtomatlashtirilgan tizim orqali davlat ijrochilari o‘rtasida taqsimlash tartibi joriy etilmoqda.

Davlat ijrochilari tomonidan qabul qilingan qarorlari va ijro harakatlari haqidagi xabarnomalarni avtomatlashtirilgan tizimdan foydalangan holda elektron pochtaga yoki mobil aloqa vositalari orqali qisqa xabar (SMS) ko‘rinishida yo‘llash choralari ko‘rilmoqda.

MIB boshqarmalari

Davlat ramzlari

Foydali havolalar