Жорий йилнинг 28 ноябрь куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида жорий йилнинг 12 март кунги “Суд ҳужжатлари ва бошқа органлар ҳужжатларини ижро этиш самарадорлигини янада ошириш чора-тадбирлари тўғрисида”ги ПҚ-4236-сонли Қарори мазмуни ва унда назарда тутилган янгиликлар юзасидан брифинг бўлиб ўтди.

Тадбирда, Бюро директори ўринбосари Ш.Хайдаров, Бюро марказий аппарати масъул ходимлари, шунингдек оммавий ахборот воситалари ҳамда расмий электрон нашр вакиллари иштирок этишди.

Маълумки, Мазкур Қарор билан жорийнинг 1 апрелдан бошлаб суд ҳужжатларини мажбурий ижро этиш жараёнига медиация институти жорий этилди ҳамда бу институт суд қарорлари бўйича томонларнинг медиатор орқали ўзаро келишиш, масалани ихтиёрий розилик асосида ҳал қилиш имконини бермоқда.

Шунингдек Қарор билан 1 июндан бошлаб, ижро иши юритишни қўзғатиш ижро ҳужжати келиб тушган вақтдан бошлаб бир иш куни ичида ижро иши қўзғатилиши йўлга қўйилди (муқаддам ижро иши 3 кун ичида қўзғатиларди).

Яна бир жиҳат, - ижро ҳаракатлари кўпи билан икки марта кечиктирилиши мумкин, олдинлари неча марта кечиктирилиши мумкинлиги қонунчиликда кўрсатилмаган эди ва бу ижро ҳужжатларининг кўп бора тўхталиб, ундирувчи томонларнинг норозилигига сабаб бўларди.

Эндиликда, ижро ҳаракатларини бажаришда юзага келган масалаларни тушунтириш учун давлат ижрочиси томонидан тайинланган мутахассис ижрочининг қарори билан танишган кундан бошлаб 15 иш куни ичида ёзма хулоса тақдим этиши қатъий белгиланган.

Матбуот анжуманида, Бюро масъул ходимлари ушбу янгиликларнинг Бюро фаолиятига татбиқ этилиши, аввало ижро ҳаракатлари бўйича томонларнинг манфаатини ҳуқуқий ҳимоя қилинишига қаратилганини билдириб ўтишди.

Бюро органлари томонидан жорий йилнинг ўтган даврида 21,9 трлн. сўмлик 2,7 млн. та ижро ҳужжатининг ижроси тамомланди.

Таҳлилларга кўра, ҳозирга қадар ижро ҳужжатлари давлат ижрочилари ўртасида бўлим бошлиғи томонидан тақсимланар эди.

Бироқ, одатий тақсимлаш тизими давлат ижрочиларининг иш ҳажмини номутаносиб белгиланишига, айрим ҳолларда ишларни тақсимлашда гуруҳбозлик ва таниш-билишчиликка шароит яратиши мумкин.

Бу каби салбий ҳолатларнинг олдини олиш мақсадида, ижро ҳужжатларини автоматлаштирилган тизим орқали давлат ижрочилари ўртасида автоматлаштирилган тақсимлаш тартиби жорий этилмоқда.

Шу сингари, Бюро масъул ходимлари тадбир иштирокчиларига эндиликда, давлат ижрочилари томонидан қабул қилинган қарорлари ва ижро ҳаракатлари ҳақидаги хабарномаларни автоматлаштирилган тизимдан фойдаланган ҳолда электрон почтага ёки мобиль алоқа воситалари орқали қисқа хабар (SMS) кўринишида йўллаш чоралари кўрилаётгани ҳақида маълумот бериб ўтишди.

Бундан ташқари, Ўзбекистон Республикаси Олий суди масъул ходимлари тадбир иштирокчиларига суд қарор(ажрим)ларининг Бюро органларига тақдим этилишининг электрон ахборот усули иш самарадорлигининг ошиши, суд қарорларининг амалдаги ижросининг шаффофлиги, тез фурсатларда ҳал этилиши  ва томонларнинг ҳимояси учун хизмат қилишини таъкидлаб ўтишди.

Брифинг давомида, оммавий ахборот воситалари вакилларининг қизиқтирган ва жамоатчилик эътиборида бўлган долзарб саволларга Бюро раҳбарияти ҳамда масъул ходимлар атрофлича тушунтиришлар беришди.

 

Бош прокуратура ҳузуридаги

Мажбурий ижро бюроси

Фойдали ҳаволалар