Жорий йилнинг 13 июнь куни  Интернетнинг “ПРАВДА ВОСТОКА нашри ПОРТАЛИ” (pv.uz сайти)да “Ишламаётган музлатгичдаги инсулин ёки МИБ ходимларининг муомаласи ҳақида” номли маълумот жойлаштирилган.

   Маълумотда, “Правда востока” таҳририяти ходими Тимур Низаев (таҳаллуси Тожи Тимуров) Бюронинг Мирзо Улуғбек тумани бўлими ходими томонидан 3 кунлик тўлов муддати ўтган электр энергиясидан бўлган қарздорлиги учун тармоқдан узиб кетилгани ва бунинг учун жарима қўлланилгани ҳамда ходимларнинг муомала маданиятидан норозилигини билдирган.

    Аниқланишича, Тошкент шаҳар Мирзо Улуғбек тумани Аланга кўчаси 10-уйда яшовчи (Ниёзова Карима Тимуровна номига расмийлаштирилган) “Правда востока” таҳририяти ходими журналист Тимур Низаевга жорий йилнинг 31 май куни табиий газ учун 330 минг 289 сўм, электр энергияси учун 209 минг 750 сўм ва ичимлик суви учун 200 минг 693 сўмлик қарздорлик учун талабномалар юборилган.

   Мазкур талабномани истеъмолчи Т.Низаевнинг турмуш ўртоғи Д.Кариева қабул қилган бўлсада, электр энергияси учун 209 минг 750 сўмлик қарздорликни бартараф этиш чоралари кўрилмаган.

   Шундан сўнг, жорий йилнинг 8 июнь куни Бюронинг Мирзо Улуғбек туман бўлими техник кузатув муҳандиси Д.Комилов истеъмолчи Т.Низаев ва турмуш ўртоғига қонун талабларини тушунтирган ҳолда, хонадонни электр энергияси тармоғидан ажратиб, далолатнома расмийлаштирган.

    Истеъмолчи Т.Низаев эса, Д.Комиловнинг ҳаракатига эътироз билдириб, шикоят қилишини билдирган.

  Ўз навбатида, Д.Комилов талабнома бўйича қарздорликни бартараф этиш чорасини кўрмаганлиги туфайли тармоқдан узганлиги ва қайта тармоққа уланиш учун энг кам ойлик иш ҳақининг 2 баравари миқдорида тўловни амалга ошириш зарурлигини тушунтиради.

  Шунда, истеъмолчи Т.Низаев талабномада қайд этилган телефон рақами бўйича Бюронинг Мирзо Улуғбек туман бўлими шўъбаси инспектори Д.Хайитбоева билан боғланиб, ҳолат бўйича тушунтириш сўрайди.

   Д.Хайитбаева ҳам Т.Низаевга тармоққа қайта уланиш учун  энг кам иш ҳақининг 2 баравари миқдорида тўлов қилиш лозимлиги ҳақида тушунтириб берган ва истеъмолчи билан қўпол муомалада бўлмаган (суҳбат видеокамера қайдлари орқали ўрганилди).

   Истеъмолчининг турмуш ўртоғи Д.Кариева қайта тўлов учун энг кам иш ҳақининг 2 баравари миқдорида (405 минг 460 сўм) тўловни амалга оширган ва истеъмолчи автомат улаш мосламаси орқали уланган.

   Ушбу ҳолатда, Бюронинг Мирзо Улуғбек туман бўлими ходими Д.Комилов Ўзбекистон Республикаси қонунчилиги талабларига тўлиқ риоя этган ҳолда ҳаракат қилган.

   Жумладан, Ўзбекистон Республикаси Президентининг 2017 йил 29 майдаги “Электр энергияси ва табиий газ етказиб бериш ҳамда истеъмол қилиш соҳасида тўлов интизомини янада мустаҳкамлаш, шунингдек ижро иши юритиш тизимини тубдан такомиллаштириш чора-тадбирлари тўғрисида”ги ПФ-5059-сонли Фармонининг 8-бандига кўра, истеъмолчилар - жисмоний шахслар ҳар ойнинг 10-санасига қадар ўтган ойда истеъмол қилинган энергия ресурслари учун тўлиқ ҳисоб-китоб қилишлари шарт, акс ҳолда белгиланган тартибда электр ва газ тақсимлаш тармоқларидан мажбурий узилиши кўрсатилган.

  Ўз ўрнида, илгари узиб қўйилган истеъмолчи (жисмоний шахс)ларни қайта тармоққа улаш энг кам ойлик иш ҳақининг 2 баравари миқдорида тўлов орқали амалга оширилади.

  Шунга асосан, Бюронинг Мирзо Улуғбек туман бўлими ходими қарздорлиги мавжуд бўлган истеъмолчини электр тармоғидан узишга мажбур бўлишган.

  Т.Низаев томонидан “Ишламаётган музлатгичдаги инсулин ёки МИБ ходимларининг муомаласи ҳақида” номли мақолани тайёрлашда,  бир томонлама ёндашилган ва ҳолатга объектив баҳо бермасдан, амалдаги қонун талаблари инобатга олинмаган.

   Мажбурий ижро бюроси истеъмолчиларнинг амалдаги қонунчилик талабларини нотўғри талқин этилиши ва асоссиз эътирозлар билдирилишини олдини олиш мақсадида, истеъмолчиларни энергия ресурсларидан фойдаланишга оид шартнома мажбуриятлари ва тўлов интизомига риоя қилишга ундайди.

 

   Мажбурий ижро бюроси

Фойдали ҳаволалар